À u primu sguardu u libru com’ughjettu faci matriculà u littori putenziali. U titulu hè carcu di misteri ma c’hè ancu a cupartura chì discrivi u drintu d’una casa anziana cù u so vechju telefonu appicatu à u muru. Accantu c’hè quidda porta mez’aparta annantu à una stanza bughja chì ci avvisa : apra stu libru ci pò fà capicciutà ind’u Nudda. Eppuri, nimu ùn sarà stranieru à i temi sviluppati ind’è u rumanzu.
A storia s’apri annantu à Romain, maritu sbagliatu chì, annantu à a via di a so ghjirandulata tonta d’omu agguaiatu da u peghju tradimentu, s’aggrundarà in a casa di a famidda, tralasciata da tutti da a morti di l’anziani tant’anni fà.
Sta ritirata aprarà à Romain, u parsunaghju principali, u violu d’una ricerca di verità. Tanti sigreti parini sipolti ind’è stu bastimentu assaltatu da u tempu ch’idd’ùn sarà più in paci finch’idd’ùn fussini scavati.
Le silence des fantômes hè u primu rumanzu di Jean-Simon Ottavi, l’autori corsu t’hà dighjà pubblicatu una raccolta di nutizii in u 2005 è s’hè fattu veda in scena cù a truppa di teatru ch’iddu hà criatu. Dopu à una strada più chì ricca di diversi viaghji è andani, s’hè firmatu in u Congo dundi insegna u teatru è l’inglesu.
Puru, ancu sè nisunu locu hè mintuvatu di manera chjara, mentri a storia ùn si vidi chè a Corsica. I stradi torti è u paesu dundi ci portani ùn poni discriva un altru locu. Qual’hè ch’ùn u cunnosci stu Tartaru cù i so abitanti pronti à annigà in u dispettu unu di i so fiddoli duvintatu frusteru ? Po, ritrova a casa di a so zitiddina, u scontru hè di sicuru unu di i mumenti più putenti di a storia. Si metti in piazza un veru scambiu trà Romain è a casa chì diventa un parsunaghju sanu è pò dassi u più impurtanti. Ma a casa ùn s’arrendi è Romain s’avvidi subitu chì, s’iddu hè ghjuntu à circà qualcosa, ùn ‘ddi sarà micca rigalatu.
L’autori pidda u so tempu pà cuntacci ciò chì si passa trà u ghjovanu è a casa ch’ùn si laca micca dumà, com’è s’idda ‘ddi vulia fà pagà d’avella sminticata tant’anni.
A so circa ci ramenta certi volti quiddi ghjochi videò dundi ugni risposta ci avvia versu un altru misteru da schjariscia. Ugni stanza, ugni mobulu t’hà a so storia sprafundata è cussì si viaghja trà u prisenti è i ricordi di zitiddina di Romain. Da a tola di u salottu à u sulaghjolu passendu pà a camara di u ziu stranu o l’attellu di u missiavu, ugni locu t’hà da veru a so anima è i so fantasimi, chì d’altrondi ùn sò tutti trapassati. Ancu u focu, di novu subbrustatu, t’hà a so piazza maiori in u racontu. Si smintica guasgi à quidda Rose, a moglia infida di Romain ch’hè d’una certa manera à l’iniziu di sta storia. I passaghji chì parlani d’idda c’aiutani à capiscia meddu à l’eroiu ma a donna ùn trova mai a so piazza trà l’omu è a casa. T’hà anch’idda u so latu bughju, ancu s’idda pari in certi mumenti un pocu cridanciula, è si smaravidda sempri di sapè s’iddi s’ani da appacià i cosi trà u coppiu fertu.
A literatura vera hè capaci à cuntacci storii cumuni senza perda u littori in via. Si pudaria guasgi dì, senza disprizzà l’opara, ch’hè da veru u cuntrariu, chì l’autori hè capaci à tenaci senza cuntà nudda in u sensu ch’iddu ùn s’impara nudda di particulari in u rumanzu. Ùn si parla micca d’un’altra cultura o d’un mistieri pricisu, si passa à i tempi d’oghji, ùn c’hè micca parsunaghju straudinariu. Tutti t’avarani i so dibbulezzi ma ancu quì ùn si trova nudda di più cumunu. U temu di u sigretu di famidda hè universali è u talentu di l’autori hè di sbuccià à facci suvità sta storia fin’à l’ultima paghjina senza stancassi mai. A scrittura hè incasciata ma limpida, i discrizzioni trimendi dani vita à tutti l’ughjetti è lochi incuntrati è nienti chì par quista vali a pena d’essa lettu.
L’avareti capita Le silence des fantômes ùn hè di quiddi libri chì facini sunnià in u sensu propriu ma s’impatrunisci i nosci menti st’autori chì scrivi com’è quiddu chì voli muscià à tutti u so amori pà a scrittura schietta ed hè quissa chì, fatta fini, c’incanta.
François Cucchi